Danksy ‘n ruim skenking van R30 000 van Harcourts Parys, sal daar dwarsdeur die jaar voortgegaan kan word met die waardevolle werk wat deur die Working on Fire-span gedoen word. Die skenking is verlede week deur Saal de Jager, eienaar van Harcourts Parys,
aan Pieter Kemp (brandbeskermigsbestuurder), Jonathan van Aswegen (voorsitter van die Vaal Eden Brandvereniging) en Sarel van der Wat (sektorleier vir Roepgroep 6, Noordwes) oorhandig. Die koste vir die bestryding van veldbrande kom meestal uit boere se sakke en kan die span, danksy bydraes soos dié ook in die somer voortgaan om strategiese brandbane in plek te kry vir die wintermaande, ook by die vliegveld en vir opkomende boere.
Hoewel die Working on Fire-span deur die regering befonds word vir salarisse, help bydraes soos hierdie om die onkoste van brandstof en voertuigonderhoud te betaal. Die span is in Parys gestasioneer en verleen hulp by veldbrande in die Parys, Vredefort, Koppies en Sasolburg distrikte.
Hoewel hulle nie opgelei is vir strukturele brande of die toerusting daarvoor het nie, is die hulp wat hulle met veldbrande in die distrik verleen, van onskatbare waarde en beskik hulle oor die voertuig en toerusting spesifiek vir veldbrande. Hulle bedien lede van die Vaal Eden Brandvereniging, maar verleen ook hulp met veldbrande binne die Ngwathe munisipale gebied. Die span bestaan uit 15 lede. Harcourts Parys daag ander sakelui uit om ook ‘n bydrae te maak.
