![](https://images.caxton.co.za/wp-content/uploads/sites/116/2021/05/speel-780x470-1.jpg)
VEREENIGING. – Die Eureka Skool vir fisies en verstandelik gestremde leerlinge se Outisme Eenheid is amptelik op 22 April geopen. Alhoewel ‘n gedeelte van die eenheid al ‘n geruime tyd gebruik word, is die laaste van die 10 klasse onlangs voltooi. Die skool het die opening laat saamval met hul Outisme Bewusmakingsdag.
![](https://vaalweekblad.com/wp-content/uploads/sites/119/2021/05/die-bord-266x400.jpg)
Corné van Zyl staan aan die stuur van sake van hierdie eenheid. Sy sê die spesiale eenheid het nou 10 onderwysers en 10 assistente wat vir 70 leerlinge op die outistiese spektrum klas gee. Daar is ongeveer 85 leerlinge met outisme in die skool, maar van hulle is reeds goed aangepas in die ander klasse en sal daarom nie geskuif word nie.
![](https://vaalweekblad.com/wp-content/uploads/sites/119/2021/05/lint-gesny-520x346.jpg)
By die outisme eenheid word daar seker gemaak dat die leerlinge nie sensories oorlaai word nie. Kinders op die outistiese spektrum kan maklik sensories oorweldig voel as daar byvoorbeeld te veel lawaai is of dinge te besig raak rondom hulle. “Ons klasse en manier van klas gee is net bietjie anders as by die res van die skool,” het sy gesê.
![](https://vaalweekblad.com/wp-content/uploads/sites/119/2021/05/eenheid-met-fotos-520x346.jpg)
Die skoolhoof, Dr. Amanda Lombard het die gaste, wat onder andere die ouers van die leerlinge in die outistiese eenheid ingesluit het, toegespreek alvorens ‘n groot rooi strik deur een van die adjunkhoofde, Cassie Bothma, gesny en die eenheid amptelik oop verklaar is. Die dag was ook ekstra spesiaal gemaak vir die leerlinge van die eenheid. Elkeen het ‘n blou ballon ontvang, daar is kolwyntjies geëet, borrels geblaas en met skuim gespeel. Corné sê elkeen se foto gaan nou ook in die eenheid opgesit word. ‘n Groot bord buite vat die eenheid en sy leerders perfek saam. Dit spel die woord Autism: Always Unique Totally Intelligent Sometimes Mysterious. Eureka Skool se Outisme Eenheid is ten eerste daar om hul leerlinge op die outistiese spektrum na die beste van hul vermoë te help en te leer, maar hulle streef ook daarna om vir die wêreld daarbuite meer te leer. Dis nie genoeg om net bewus te wees van outisme nie, mense op die outistiese spektrum moet aanvaar, ondersteun, gerespekteer en ingesluit word. Soos wat Corné in haar voorlegging aangehaal het: “Autism is not a processing error. It’s a different operating system.