Vandag is jou plek leeg in die strate van Parys

Vir die afgelope 21 jaar was die gesig van Samuel Molaba agter die stuur van die bakkie wanneer hy Donderdae saam met sy span die Parys Gazette in die dorp versprei het, ‘n bekende prentjie. Maar vandag is anders. Vandag was Samuel se plek leeg. Samuel is Sondag 14 Maart oorlede, vermoedelik aan sy hart. Hy was ‘n boorling van Welkom en vir 26 jaar lank gemoeid met die verspreiding van koerante en strooibiljette. Hy was ten tyde van sy dood in diens van ENLD. Samuel se dood laat ‘n groot leemte by nie net sy span nie, maar ook sy kollegas met wie hy jare lank saamgewerk het. Ons salueer jou Samuel vir die jare wat jy getrou gesorg het dat Parysenaars elke Donderdag ‘n Gazette in die posbus gehad het. Ons diepe medelye met sy familie en kollegas.