‘n Bestelvorm van die Dr. Kenneth Kaunda onderwysdepartement, met ‘n datumstempel van 13 Januarie, het goedkeuring gegee dat  R486 635 vir die oprigting van ‘n sekuriteitswag-huisie aan ‘n kontrakteur gelewer word. Foto’s van dié dokument word tans op sosiale media versprei.

Dié geboutjie wat met elektrisiteit, ‘n toilet en wasbak toegerus is, is reeds by die ingang van die skool gebou en bied skuiling aan ‘n sekuriteitswag.

Nadat die Herald navraag by die skool gedoen het, is nog net die huisie in plek, maar geen sekuriteitswag is aangestel nie. Na bewering sal die onderwysdepartement die sekuriteit uitkontrakteur, sê ‘n betroubare bron van die skool wat anoniem wil bly.

‘n Lid van die beheerraad sê hulle het by die onderwysdepartement aansoek gedoen vir sekuriteit omdat die skool al verskeie kere onder plunderaars deurgeloop het. Hulle het verlede jaar tydens die reses by die skool ingebreek en onder meer die administratiewe gebou en die hoof se kantoor geplunder. Vandaliste knip ook gereeld gate in die heining rondom die skool.

Nadat die Herald die kommunikasiewoordvoerder van die Noordwes onderwysdepartement, Elias Malindi, vir kommentaar genader het, het hy ‘n verklaring uitgereik. Daarin bevestig hy dat Mmaphefo Matsamela, ‘n lid van die onderwysdepartement se uitvoerende raad, Woensdag, 3 Februarie ‘n komitee sal saamstel om so gou moontlik die saak te ondersoek.