Die ontvoering het Woensdagmiddag na 14:00 plaasgevind toe twee verdagtes met die twintigjarige ma se babaseuntjie weggery het terwyl sy in ʼn winkel ingegaan het om kos te koop.
Een van die verdagtes was ʼn vrou wat haar voorgedoen het as ʼn SASSA-werkgewer. Sy het die ma Dinsdag (3 November) in Ventersdorp ontmoet en het gesê sy sal haar help om haar kind se geboorte te registreer.
Hulle het Woensdagoggend saam in ʼn taxi van Ventersdorp af Potchefstroom toe gery. By die taxi-staanplek het ʼn man in ʼn rooi Toyota Tazz op hulle gewag en ʼn paar draaie in die stad gery.
Naby Potchefstroom Hospitaal het hulle by ‘n groentewinkel, “Hospitaal groente en wegneemetes”, op die hoek van Kock- en Chris Hanistraat gestop. Die SASSA-vrou het vir die ma R20 gegee om vir hulle tjips te koop en toe sy uit die winkel kom, het hulle met haar baba weggery.
Volgens kapt. Botma is die man wat die motor bestuur het naby Ikageng vasgekeer terwyl die vrou met die baba in Rustenburg gevind is. Die twee verdagtes is tans in aanhouding en verskyn Maandag, 9 November in die Potchefstroomse landdroshof op ʼn aanklag van ontvoering.
