Helikopter kom land in dorp
‘n Groot misdaadbewusmakingsaksie word Vrydag 28 Augustus deur CSS Sekuriteit in Parys geloods. Die voertuie wat deelneem kom van Kroonstad af in die dorp in en sal langs Breëstraat beweeg tot by die Wimpy. Naas CSS, sal die SAPD, verkeer, nooddienste en We Care ook deel vorm van die veldtog.
Die aksie sluit onder meer in dat CSS se noodhelikopter as deel van die bewusmakingsaksie tussen 10:00 en 12:30 op die parkeerterrein van die Palm Gate-sentrum (waar Wimpy is) sal land. Die parkeerterrein sal reeds van vroeg Vrydagoggend vir die duur van die bewusmakingsaksie gesluit wees vir verkeer.
Onthou ook dat sosiale afstand te alle tye gehandhaaf moet word, en dat die dra van maskers in die openbaar steeds geld. Ook dat mense nie in groot groepe sal saamdrom nie.
Die publiek is egter baie welkom om te kom kyk en foto’s te neem van dié eerste wat nog nooit in Parys se sakekern gesien is met ‘n helikopterlanding op ‘n parkeerterrein in die sakekern nie.
Die voertuie sal dan weer van Parys af terugbeweeg deur Potchefstroom en Stilfontein, en vandaar terug na Klerksdorp. Saterdag 29 Augustus sal daar ook weer bewusmaking in die Klerksdorpse sakekern wees, sowel as in Bothaville.
