Hoewel die 4-jarige Leonel Riekert van Parys nog nie teen vandag, Dinsdag 9 Junie, die sig in haar linkeroog kon terugkry nie, is daar vandag op haar oog geopereer om skade aan haar retina te herstel. Nog operasies sal nou volg om te probeer om ook haar sig te herstel.
Vandag se operasie is in die Johannesburgse Ooghospitaal deur dr. Bernard Wolff gedoen waar gesien is wat die omvang van die skade aan haar ogie is, wat ernstig beseer is na ‘n fratsongeluk op Dinsdag, 2 Junie toe sy met ’n skêr wat sy in haar handjies gehou het, geval het.
Nadat oogspesialis, dr. Corné Gouws, verlede week die wond toegemaak het, is daar Donderdag, 4 Junie met die ondersoek gesien dat Leonel se retina weens die besering los is, en is sy na dr. Wolff, ‘n vitreo-retinale spesialis, verwys.
Die gesin het nie ’n mediese fonds nie en die staat doen tans nie sulke delikate operasies soos wat Leonel dringend moes kry om haar sig, en skade aan haar oog te probeer herstel nie.
Sedert Parys Gazette verlede Donderdagmiddag oor klein Leonel se fratsongeluk berig het, is ‘n trustfonds vir haar gestig wat deur prokureur Stefan Scheepers van Parys geadministreer word.
Mense van oral oor het eenvoudig net hul harte oopgemaak vir die gesin en is binne twee dae R125 000 vir Leonel ingesamel wat genoeg was om vandag, (Dinsdag 9 Junie) se operasie te kon betaal, en te help met die opvolgoperasies en behandeling wat sy sal nodig hê.
Vir Leonel gaan dit ‘n lang pad na herstel wees, maar pak haar ouers, André en Mari, elke dag in geloof aan.
Hulle sê dat woorde nie kan beskryf hoe ongelooflik dankbaar hulle is vir elke oproep, boodskap, gebed of bydrae sedert Leonel se ongeluk.
