Een persoon is dood en vier ander beseer in ‘n botsing tussen twee voertuie vanmiddag (Maandag 23 September 2019) op die R59 in Meyerton.
Volgens Ineke van Huyssteen, ‘n woordvoerder van ER24, het paramedici van dié en ander nooddienste kort na die botsing op die toneel opgedaag. Een pasiënt is met noodlottige beserings aangetref en op die toneel dood verklaar. ‘n Baba is ook ernstig beseer en is per mediese helikopter na ‘n hospitaal geneem.
Twee ander mense is ernstig beseer, terwyl ‘n ander een ligte beserings opgedoen het. ER24, sowel as die provinsiale nooddienste (EBW), het die beseerdes hospitaal toe vervoer vir verdere mediese sorg.
Die presiese omstandighede rondom die voorval is nog nie bekend nie maar die betrokke owerhede was op die toneel om dit verder te ondersoek.
