‘n Onderwyser by Kollegepark Laerskool in Vanderbijlpark is na bewering een van drie verdagtes wat gisteraand (4 September) in verband met die ontvoering van Amy-Leigh de Jager (6) in hegtenis geneem is.

Die drie verdagtes, ouderdomme 27, 40 en 50, is gisteraand kort voor middernag by ‘n kleinhoewe in Rosahof buite Vanderbijlpark, in hegtenis geneem.

Amy-Leigh is net na 07:15 Maandagoggend (2 September) buite die skool uit haar ma se hande gegryp en in ‘n Toyota Fortuner ontvoer.

Sy is vroeg die volgende oggend deur twee mense langs die pad buite die Shakespeare Inn in Faraday-boulevard gevind.

Die polisie is op soek na minstens nog een verdagte.

Die drie wat reeds in hegtenis geneem is, verskyn Maandag in die hof in Vanderbijlpark.