Dit was boete, betaal of boei, en aan die einde van die dag groot pret. Dit alles ten bate van hulle wat minder het.
Vrystaat Versorging in Aksie (VVA) se jaarlikse Boete, Betaal of Boei-fondsinsameling, is op Saterdag 3 Augustus by AB’s Pub gehou.
Die “lasbriewe” is in Julie bedien, en kon die aangeklaagdes vrywillig hul “boete bydrae” vir VVA gee om te help voorsien in die nood van hulle wat minder het.
Vir dié wat laat geslaap het met die boete betaal, het die “boeie” gewag en moes daar opgedok word om agter die tralies uit te kom.
Van die gevangenes het ure agter tralies deurgebring om die borggeld darem ’n stewige hupstootjie te gee, want sien – die regter het geen genade gehad met boetes van tot R4 000 wat opgelê is.
Staatsaanklaer Christelle Fouché en regter Anne-Marie du Toit was op die regsbank, terwyl Celeste en Gerhard, en kapt. Susan du Preez van Parys SAPD, die arrestasies uitgevoer het.
VVA sê dankie aan elkeen wat met ’n mooi gesindheid en oop hand hierdie fondsinsameling ondersteun het, en boonop gesorg het vir ure se lekker lag en saamkuier.
Weet dat elke bydrae ’n verskil in die gemeenskap maak.