Ses Parysenaars het verlede naweek hul slag gewys by die 50ste SA Ringtennis-toernooi in Polokwane.
Die Parysenaars wat vir die Sedibeng A- en B-spanne gespeel het, was Attie Goosen (Sedibeng B-spanbestuurder), Esther Goosen, Louwrens Vos, en die Eybers-familie, pa, dogter en kleinkinders Elna, Juané en
Morné, en oupa Johan Britz van Kroonstad.
Die SA’s het enkelspel wedstryde, gemengde dubbels, mans dubbels en dames dubbels kragmetings ingesluit, met elke wen wat gesorg het vir twee punte op die telbord. Vier provinsies – Sedibeng, Gauteng-Sentraal, Limpopo en Gauteng-Noord het deelgeneem, terwyl ‘n Duitse klub ook hul slag kom wys het.
Sedibeng B waarvan Elna, Juané, Morné en Louwrens deel was, het aan die einde van die toernooi drie bronsmedaljes en ‘n silwermedalje huis toe gebring.
Morné is ook na afloop van die toernooi in die SA o.13 uitnodigingspan ingesluit, Louwrens en Juané in die SA o.21 uitnodigingspan en Esther in die SA Veterane uitnodiging-span.
Wêreldkampioenskappe in dié sport word elke vier jaar gehou en is die 2018 Wêreld Ringtennistoernooi in Belarus gehou met Duitsland wat die wenners was.
Lande waar die sport tans gespeel word, sluit in Suid-Afrika, Duitsland, Indië, Amerika, Pakistan, Brazilië, Belarus, Pole en Nederland.
Die Parys Ringtennisklub sal in Mei vanjaar ‘n jaar oud wees en was dit die klub se eerste SA-deelname.Parys Ringtennisklub oefen Dinsdae en Donderdae tussen 17:00 en 18:00 in die NG-Oos kerksaal.
