Ngwathe Plaaslike Munisipaliteit se geldsake het dramaties verswak gedurende die mees onlangse boekjaar (tot 30 Junie verlede jaar). Vir die derde agtereenvolgende jaar het Ngwathe nou ‘n swakker ouditeursopinie as in die vorige jaar ontvang.
Dit blyk uit Ngwathe se Jaarverslag, wat, tesame met die jaarstate en Ouditeur-generaal (OG) se opinie, verlede Donderdag deur burgemeester Joey Mochela tydens ‘n raadsvergadering in Parys ter tafel gelê is.
“Die Ouditeur-generaal se opninie is ‘n sogenaamde ‘weerhouding’, wat die swakste moontlike oudituitkoms vir ‘n munisipaliteit is, “ sê DA-raadslid Arnold Schoonwinkel.
Hy sê die rede is o.m dat geeneen van die 26 kwelpunte wat die OG in die vorige boekjaar uitgewys het intussen verbeter het nie.
“Trouens, nege areas het verder verswak.” Hy noem die agterstallige skuld aan Eskom as voorbeeld: dit het met R183m toegeneem, na R932m verlede Junie. “Dis nou waarskynlik digby R1 miljard, hoewel raadslede eenvoudig nie weet nie.”
Die Jaarverslag lê tans by biblioteke, munisipale kantore, en die munisipale webtuiste ter insae, waar belastingbetalers dit kan inspekteer.
Raadslid Andries Vrey ( Wyk 12) gaan ‘n openbare vergadering belê, vir verdere inligting, en vrae en voorstelle vanaf die publiek. Hy sê die publiek het die reg om kommentaar te lewer.
Hy het sy wykskiesers reeds verlede week op WhatsApp ingelig dat die nettoverlies vir die boekjaar R188m bedra.
Die munisipale oorsigkomitee oor die Jaarverslag gaan ook met die OG vergader om probleemareas te bespreek.
