Sedert die PSIRA-optrede in Parys waartydens ongeregistreerde motorwagte van die strate verwyder is, het verskeie Parysenaars en sakelui hul harte oopgemaak vir motorwagte in die dorp, en van die toegewyde motorwagte gehelp om hul PSIRA Graad E-eksamen suksesvol te kon aflê.
Hieronder tel motorwagte by die Pick ’n Pay sentrum wat almal hul PSIRA-eksamen suksesvol afgelê het danksy die borgskap van Lukas van Rooyen van Pick ’n Pay.
Nou doen hulle weer hul dagtaak met groot trots. en sê hul prontuit dat dié sertifikate vir hul selfwaarde gegee het.
Hoewel die manier waarop PSIRA opgetree het, nie vir hulle aanvaarbaar was nie, glo hulle dat daar ook ‘n positiewe gevolg van die optrede was. Vir hulle is die sertifikate ‘n bewys dat hulle erns het met hul werk, en hulle beslis nie bedel nie, maar ‘n diens lewer.
Boonop kan die publiek die versekering hê dat motorwagte wat PSIRA-sertifikate en registrasie het, geen kriminele rekord het nie.
Ongelukkig het daar na die PSIRA optrede onjuiste stories die rondte gedoen dat motorwagte verwyder is omdat hulle glo verbode middels verkoop het. Die gerugte is onwaar, sê die groep.
Ook Lukas sê dat dié groep motorwagte oor jare deel is van die Pick ‘n Pay sentrum en dat kliënte vra vir hul teenwoordigheid juis vanweë hul vriendelikheid en hulpvaardigheid teenoor die publiek.
Ongelukkig is daar nog steeds ongeregistreerde motorwagte by verskeie punte in die dorp wat die PSIRA-optrede vrygespring het. Maak dus seker wie jy toelaat om na jou motor te kyk.
Onthou ook dat ten spyte van die PSIRA opleiding geregistreerde motorwagte se enigste inkomste steeds net die footjies is wat hulle daagliks van die publiek ontvang. Hulle maak dus staat op die publiek se ondersteuning.
Daar is intussen versoek dat PSIRA ‘n opvolg optrede in die dorp sal hou, om seker te maak dat alle motorwagte in die dorp wel geregistreer is.
