Mense begin ontruim. Voorkomend sê hulle. Gevaar van rook inaseming.
Om jou hang die rook verstikkend, vreesaanjaend dik in die lug. Jy kyk op vir ‘n belofte van reën. Smeek vir uitkoms…en dan begin dit liggies reën, jubelende uitkoms. In jou hart die hoop dat die genade-water die vlamverwoesting sal rem.
Dis druk verkeer en sirenes oral. Die Outeniqua-pas gesluit tot verdere kennisgewing. Die kinders is al vroeg gaan haal by die skool in Blanco as gevolg van die dreigende vlamme.
Dit is werklik ‘n resue brand. ‘n Vriendin wat lank hier woon sê sy het nog nooit so ‘n erge brand so naby George beleef nie. ‘n Week gelede het dit al agter die Montague-pas by Harold begin brand. Die afgelope week was baie warm en droog. Daar was heelwat mense wat die vuur probeer blus het.
Foto’s verskaf deur Tanja Holtzhausen.
Ons het gister op my broer se stoep gestaan en kyk hoe die helikopters en waterbommers vlieg en water op die vlamme gooi.
My broer-hulle is van dié in Heatherlands wat kennisgewing gekry het om te ontruim. Dis voorkomend weet jy – maar die angs vreet in koue rillings aan jou ten spyte van die 35 grade daarbuite.
Ek dink aan die mense van Blanco, Golden Valley, Step Aside en Glenmore wat vrywillig moet ontruim.
En ek bid vir reën….
