Die plaaslewe en baie geduld. Dit is die Meyer-egpaar van Parys se suksesresep vir 65 jaar se getroude lewe wat hulle op 29 September sal vier. Willie (90) en Wina (88) Meyer is die afgelope nege jaar in Parys gevestig en kom oorspronklik van Tweeling waar Willie geboer het tot op 81. Vandag nog is hy ‘n kranige tuinier wat graag werskaf in sy groentetuin. Wina is op haar beurt ook ‘n vrou van vele talente. ‘n Onderwyseres van beroep wat op haar dag orrelis was in haar kerk, die mooiste naaldwerk gedoen het en selfs trourokke gemaak het.
Ongelukkig laat haar sig haar nie meer toe om te kan lees en naaldwerk te doen soos vroeër nie, maar is sy nog vol kwinkslae.
Die egpaar is destyds op Frankfort getroud. Uit die huwelik is vier kinders gebore, en vandag het hulle 9 kleinkinders en 7 agterkleinkinders.
Om saam so op jou voete te kan oud word, sê hulle is geen prestasie nie, net ’n genade. En dit sien jy wanneer jy hoor hoe bedrywig dié twee nog is.
