Met die toenemende krisis wat die Vaalrivier weens besoedeling ondervind, is dit belangrik dat elke munisipaliteit alles in sy vermoë doen om natuurlike bronne te beskerm.
Die VF Plus het die munisipale bestuurder van Ngwathe (Parys, Koppies, Heilbron,Vredefort en Edenville), mnr Bruce Kannemeyer, amptelik versoek om nuwe tegnologie te ondersoek wat reeds in Australië gebruik word om besoedeling meer effektief te bestuur.
Nette word by sommige Australiese stede en dorpe by die uitlaat, waar stormwaterpype in riviere en ander waterbronne vloei, gemonteer om swaar rommel vas te keer. Die nette kan maklik vervaardig word en die skoonmaak daarvan is eenvoudig.
Die VF Plus sê dit is ‘n eenvoudige manier om vullis uit die Vaalrivier te hou en kan met vrug by veral Parys aangewend word om die rivier skoon te hou.
Die VF Plus het ook in sy versoek aan die munisipale bestuurder gevra dat die munisipaliteit alles in sy vemoë doen om riool uit die rivier te hou. Die munisipaliteit kan dit nie bekostig om, soos Emfuleni in Gauteng, rioolwerke in so ‘n mate te verswak dat dit tot ‘n omgewingskrisis lei nie.
“Inwoners van Parys verdien ‘n munisipaliteit wat daartoe verbind is om die omgewing tot voordeel van inwoners te beskerm.”
