Inwoners in die omgewing van Conroy- en Frolichstraat, sit reeds sedert 24:00 gisteraand (Maandag 9 Julie) sonder krag, nadat koper weer gesteel is uit ‘n mini-substasie. Die verwagting is dat sou daar parte gekry word, krag moontlik eers baie laat vanmiddag of selfs môre-oggend herstel sal word.
Die diefstal van die koper uit mini-substasies in Parys kos die Ngwathe munisipaliteit alreeds derduisende. In net 2 weke het 4 mini-substasies reeds deurgeloop. Die skade is nagenoeg R400 000 per substasie buiten die koste aan arbeid.
Wat egter nog meer kommerwekkend is, is dat parte nie geredelik beskikbaar is nie omdat dit so ‘n groot kapitale uitgawe is, en bykans die hele substasie vervang moet word. So kan dit tussen 6 tot 8 weke neem om ‘n substasie te bou, sou daar nie parte gekry kan word vir die beskadigde dele van die mini-substasie nie. Met die vorige diefstal was Ngwathe gelukkig om parte by ‘n kontrakteur te kon kry en is die kragtoevoer binne ‘n dag herstel.
Die mini-substasies word van bo af oopgebreek waarna die koper uitgehaal word. Ngwathe het in die verlede ook groot verliese gely as gevolg van die diefstal van oorhoofse elektriese kabels, ook vir koper.
Die bokant van die mini-substasie in Conroystraat wat eenvoudig oopgebreek word.
Op die foto kan die gedeelte van die mini-substasie gesien word waar die koper uitgehaal word.
Die agterkant van die mini-substasie.
