Agt mense is dood waarvan vyf onherkenbaar verbrand is nadat ʼn bakkie en ʼn minibus gisteraand tussen Derby en Ventersdorp gebots het.

Volgens polisiebeamptes wat op die toneel was, het beide die voertuie aan die brand geslaan kort na die ongeluk plaasgevind het. Daar is eers sewe mense op die toneel dood verklaar waarvan vyf so erg verbrand is dat hulle onherkenbaar was. Twee pasiënte is na die naaste hospitaal geneem, maar een het met aankoms by die hospitaal gesterf. Die tweede pasiënt is stabiel.

Volgens die Noordwes Departement van gemeenskapsveiligheid was daar twee mense in die bakkie wat op pad was na Derby vanaf Ventersdorp en die minibus, met sewe mense, het in die teenoorgestelde rigting gery.

Daar is net een oorlewende. Die oorsaak van die ongeluk is nog nie bekend nie maar die polisie ondersoek ʼn saak van strafbare manslag.