Prof. Pieter Joubert, ‘n sielkundige in Potchefstroom haal navorsing aan wat in 2012 deur Unisa gedoen is oor boeliegedrag by skole. 3 371 leerders was deel van die navorsing. Hy sê dat 38,4% van die kinders slagoffers is van fisieke boeliegedrag, 55,3% is slagoffers van emosionele treitering en 16,9% is slagoffers van treitering deur sosiale media soos Facebook, WhatsApp en Twitter. Verdere resultate toon dat 32,2% van die kinders tydens skooltyd in die klaskamers geboelie word en 29,3% na skool geboelie word.

In ‘n artikel wat in 2012 deur Michele Borba, ‘n internasionaal bekende opvoedkundige sielkundige en ouerskap- en boeliekenner, gepubliseer is, sê dat hierdie die tekens is wat moontlik wys dat ‘n kind geboelie word: 

• Fisiese merke, snye en skaafplekke wat nie verduidelik kan word nie.

• Speelgoed, skryfbehoeftes, klere, snoepiegeld of kos wat wegraak.

• Speelgoed, elektroniese toebehore of boeke wat beskadig word of geheimsinnig wegraak.

• Wanneer die kind gereeld nie wil skool toe gaan of aan ander aktiwiteite saam met sy portuurgroep wil bywoon nie.

• Wanneer ‘n kind skielik baie ouervas is en bang is om alleen gelaat te word.

• Wanneer ‘n kind skielik homself begin onttrek van ander maats.

• ‘n Verandering in die kind se tipiese gedrag of persoonlikheid.

• Die kind kom gereeld hartseer voor en het gemoedswaaie, is kwaad, angstig of depressief sonder enige ooglopende redes.

• Wanneer ‘n kind gereeld kla van hoofpyn of maagpyn.

• Wanneer ‘n kind sukkel om te slaap, gereelde nagmerries kry of skielik bed begin natmaak.

• Wanneer ‘n kind se eetgewoontes skielik verander.

• Wanneer ‘n kind begin om jonger boeties of sussies af te knou.

• Wanneer ‘n kind nie die skool badkamers wil gebruik nie (hierdie kan ‘n boelie-teikengebied wees).

• Wanneer ‘n kind skielik minder vriende het of nie meer tyd saam met sy vriende wil spandeer nie.

• As die kind gereeld honger by die huis kom (boelies vat soms slagoffers se snoepiegeld of toebroodjies).

• Wanneer ‘n kind se punte skielik aansienlik baie begin afneem.

• Wanneer ‘n kind voel asof hy nie goed genoeg is om ‘n sekere ding te doen of te behaal nie.

• Wanneer ‘n kind sê dat hy hulpeloos voel of nie meer wil lewe nie.

• Wanneer ‘n kind wil weghardloop.