Rooi tapyte uitgerol vir vanaand se openingsrede en laaste premierstoespraak

Alles is gereed. Die rooi tapyte uitgerol, die saal in wit gedrapeer en stoele oorgetrek met wit, donkerblou en ougoud. Spyseniers staan reg. Klank is getoets en die dorp se sypaadjies skoongemaak. Vanaand is die groot aand wanneer die Vrystaatse premier Ace Magashule sy laaste premierstoespraak lewer tydens die Vrystaatse regering se openingsrede wat hier in sy tuisdorp by die AfriDome gehou word. ‘n Opvolger vir Magashule in die premiersstoel is nog nie aangewys nadat hy as die ANC se sekretaris-generaal verkies is nie. Vir Parys is die openingsrede van die Vrystaatse regering ‘n eerste vir die dorp en geld, swier en styl ontbreek daar beslis nie vir dié glansgeleentheid.