‘n Bejaarde egpaar is vanoggend (1 Desember) in Louwstraat aangeval en beroof.

Volgens Kapt. Mvula Chaka, polisiewoordvoerder, was ‘n polisieman omstreeks 05:50 op pad werk toe, toe hy deur die egpaar se bure voorgekeer is. Hy het ondersoek ingestel waarna hy die egpaar in die huis gevind het.

IMR ambulansdienste het op die toneel gekom, ongelukkig het die man reeds aan sy beserings beswyk.

Volgens Leon Nell, paramedikus van IMR is die vrou wat ongeveer 69 jaar oud is in ‘n kritieke toestand na Medi-Clinic Potchefstroom vervoer vir verdere behandeling.

Die polisie het kort na die voorval die gesteelde bakkie langs die Mooibankpad aangetref. Dit blyk dat die bakkie gerol het, een man wat in bakkie was is in hegtenis geneem om ondervra te word.

“Die saak word steeds ondersoek,” het Chaka gesê.