Verhoor eers Woensdag hervat
Die verhoor van die 6 mans van Parys wat tereg staan op twee klagte van moord na die dood van Samuel Tjixa en Simon Jubeda, is Maandagmiddag deur regter Corné van Zyl in die Hoë Hof in Parys uitgestel na Woensdagoggend ná beide die verdediging en die staat haar genader het oor ernstige kwessies wat …
![](https://images.caxton.co.za/wp-content/uploads/sites/116/2017/11/images-2.jpg)
Die verhoor van die 6 mans van Parys wat tereg staan op twee klagte van moord na die dood van Samuel Tjixa en Simon Jubeda, is Maandagmiddag deur regter Corné van Zyl in die Hoë Hof in Parys uitgestel na Woensdagoggend ná beide die verdediging en die staat haar genader het oor ernstige kwessies wat hulle aanvoer eers uitgestryk moet word voor die verhoor kan voortgaan.
Regter Van Zyl het daarna beide regsspanne kans gegee tot môre (Dinsdag 14 November) om 09:00 om terugvoer aan haar te gee. Sy het ook gesê hoewel sy nie kennis dra van die betrokke kwessies nie, sy seker is dat dit in belang van geregtigheid is dat dit eers aangespreek word voor die saak kan voortgaan.
Die saak sal dan weer op Woensdag 15 November hervat word en is op die hofrol tot 24 November. Geen getuienis of kruisondervraging sal môre gelei word nie.
Die staat beweer dat die ses aangeklaagdes, Boeta van der Westhuizen, sy seun, Loedie van der Westhuizen Jr en Boeta se skoonseun Miela Janse van Vuuren, asook kapt Henk Prinsloo, Anton Loggenberg en sy seun, Cor Loggenberg, na bewering glo die twee oorledenes so erg sou aangerand het op 6 Januarie 2016 op die plaas Swartklip in die Weiveld-distrik, dat hulle aan hul beserings beswyk het.
Tjixa en Jubeda is daarvan verdink dat hulle betrokke was by ‘n plaasaanval op Loedie van der Westhuizen Sr.
Adv. Nico Dreyer asook Kobus Burger, Gideon Mandelstam en Hannes Grimbeek verskyn vir die 6 beskuldigdes. Adv. Jabulani Mlotshwa en adv Sandile Mthethwa verskyn vir die staat.