Só wil VVA ons bejaardes help

Die Sonskynklub vir bejaardes 65 jaar en ouer is onlangs deur Vrystaat Versorging in Aksie (VVA) gestig.  Die doel van die klub is om uit te reik na bejaardes in ons gemeenskap met ondersteunende hulpdienste wat teen bekostigbare tariewe aan klublede gelewer sal word.
Hiermee wil VVA help om ons ouer persone in staat te stel om so lank as moontlik selfstandig en onafhanklik as volwaardige lede van die gemeenskap aktief te kan funksioneer. Daarmee saam kan bejaardes ook steeds ’n groot rol speel in die gemeenskap en ook onder mekaar met hul talente en tyd wat op vele terreine ’n verskil kan maak.
Dienste wat tans met die uitreikpoging na bejaardes deur VVA ingesluit word, is maatskaplike dienste, tuisverpleging, mediese hulpmiddels, tuis- en tuinhulp koördinering, haarkappery, naelversorging, neem van bloeddruk en suikertoetse, ’n telefoondiens waarmee daagliks met bejaardes gekommunikeer kan word om seker te maak hulle is versorg, gereelde maandelikse uitstappies, vervoer na inkopiesentrums, fliekdae/speletjies, ’n  naaldwerk/boekklub en nutsman diens vir klein takies.
Die ledegeld vir die klub is slegs R50 per jaar sê Sanette Boonzaier, gemeenskapskoördineerder vir VVA. Bejaardes wat lid is van die klub sal die genoemde dienste baie goedkoper kry.
Vyf en dertig bejaardes het reeds die stigtingsvergadering in September bygewoon en alle bejaardes is welkom om Sanette te skakel by 079 324 0603 met navrae oor hoe om in te skakel by die Sonskynklub, of oor die dienste wat gebied word.
Kerke in die dorp word ook gevra om bejaardes in hul gemeentes aan te moedig om aan te sluit by die klub en gebruik te maak van hierdie hand van hulp wat na ons bejaardes uitgereik word.