BARRAGE. – Die polisie se watervleul, Barrage polisie, die Wesrand- en Vaalrand se K9 Search and Rescue eenheid soek al die afgelope drie dae na die liggaam van ‘n man wat vermoedelik in die Vaalrivier langs Vaaloewer, op die plaas Rotsdrif, verdrink het.

Adriaan Haasbroek van die Wesrand het saam vriende die afgelope naweek by die oord langs die rivier gekuier toe hy blykbaar in die vroeë oggend-ure gou ‘n draaitjie moes gaan loop. Hy het egter op onverklaarbare wyse in die water beland. ‘n Vriend van hom het met ‘n flits in die water in gelig maar die battery was pap. Met ‘n ander flits wat hy gaan haal het, het hy gesien dit lyk of Adriaan swem. Toe hy egter die ander vriende roep en ‘n bootjie na die water gebring het, was Adriaan weg.

Polisie soek reeds die aflope paar dae na die liggaam. Dinsdag 5 September is twee hommeltuie ingespan in die soektog na Adriaan. Die hulp van snuffelhonde van twee K9 eenhede is ook gebruik. Hierdie honde kan ‘n liggaam wat onder die water is op die oppervlakte ruik. Sekere areas is wel geïdentifiseer maar die duikers se taak word egter bemoelik met die vloei van die rivier, rotse en ‘n keerwal. Die liggaam lê heelwaarskynlik agter die keerwal in ‘n diepte tussen twee en elf meter. Die soektog hervat vandag Woensdag 6 September.