DBV-inspekteur nie vervolg ná klag nie

Die klag van diefstal van ’n  hond teen Maggie Singh, ’n leerling inspekteur in diens van die Parys DBV, is Maandagoggend teruggetrek nadat bevind is daar is geen strafregtelike gronde om te vervolg nie.
Singh is verlede Donderdagmiddag net na 14:00 deur die polisie in hegtenis geneem nadat ’n honde-eienaar haar van die diefstal van sy hond aangekla het. Sy is ná ’n  nag in die polisieselle eers Vrydagmiddag op polisieborgtog van R1 000 vrygelaat.
Die klag spruit uit ’n voorval op 15 Mei toe die hond as rondloperhond deur die plaaslike DBV geskut is, en toe nege dae later in lyn met DBV-beleid van kant gemaak is. Die hond is klaarblyklik by die DBV afgegee as  rondloperhond.
Die plaaslike DBV het ’n ooreenkoms met die Ngwathe munisipaliteit om as skut vir kleiner diere vir die hele Ngwathe op te tree. Hoewel die oorspronklike ooreenkoms net vir ’n jaar was, is die ooreenkoms met die wisseling van munisipale bestuurders nog nie weer skriftelik hernu nie, maar betaal die munisipaliteit steeds maandeliks die ooreengekome bedrag aan die DBV vir skutfooie, sê Simon Olley, waarnemende voorsitter van die Parys DBV.
Mnr. Olley het die arrestasie bevestig en gesê dat hy net na 14:00 Donderdagmiddag in kennis gestel is daarvan. Volgens mnr. Olley is hy nie toegelaat om haar by die Tumahole-polisiestasie te sien waar sy aangehou is nie, omdat hy nie haar regsverteenwoordiger is nie.
Luidens die ooreenkoms met die munisipaliteit word van die DBV verwag om alle rondloperdiere te skut vir ’n ses dae periode soos deur die munisipale bywette bepaal word, tensy die DBV-inspekteur of veearts sou vind dat die dier weens besering of ander toestand dadelik van kant gemaak moet word.
Nuwe bywette vir die munisipaliteit is nog nie in plek nie en die ou bywette ook nog nie herroep nie.
DBV beleid bepaal dat die organisasie ’n dier vir sewe dae aanhou en versorg waarna ’n besluit oor die toekoms van die dier geneem moet word. As daar ’n moontlikheid is dat die dier aangeneem kan word, word dit vir aanneming beskikbaar gestel.
Sou die dier egter binne die sewe dae periode nie deur sy eienaar uitgeken en die skutfooie betaal word nie, word die dier van kant gemaak as daar nie ’n moontlikheid vir aanneming is nie, wat ook dan in die geval gebeur het.
Sou ’n eienaar wel die dier kom opeis ná die skutperiode verby is, moet die dier eers gesteriliseer word voordat dit aan die eienaar terugbesorg mag word ingevolge DBV-beleid.
Intussen is ’n werknemer van die DBV verlede week deur die polisie aangesê om vyf hondekarkasse op te grawe omdat die polisie die dooie hond waarvoor die klag aanhangig gemaak is, wou sien. Die eienaar se hond was nie tussen die karkasse nie.
Die Nasionale Raad van DBV’s het gesê dat hulle nie op hierdie stadium gaan kommentaar lewer nie, maar hul eie ondersoek sal doen oor die aangeleentheid en daarna sal reageer.