Vier mense is gisteraand in gietende reën en koue in twee afsonderlike voorvalle in uiters moeilike omstandighede uit die Kromelmboogspruit op die Wolwehoek-pad tussen die plase Piomont en Klipdrift in die Weiveld-distrik gered nadat hul bakkies deur vloedwater meegesleur is. Al vier, insluitend ‘n pa en sy 9-jarige dogter van Vanderbijlpark is ongedeerd.

Boere van die Weiveld-distrik, noodreddingswerkers van onder meer Parys Medix en ER 24, die Vaalrand Watervleuel, die Koppies, Parys en Zamdela Cluster polisie en a.o. Jan le Roux en kapt Henk Prinsloo, We Care, LGV en  ander vrywilligers het nie geskroom om te help om die mense uit die vloedwater te kry. Uit alle oorde was daar groot lof in besonder vir die Weiveld-boere en die polisielede vir die uitstekende en onbaatsugtige reddingswerk waarmee hulle selfs hul eie lewens op die spel geplaas het.

Die reddingsoperasie van die vier mense uit Kromelmboogspruit van 21:00 die aand tot net na 24:00 toe die pa en dogter uitgehaal is, het gevolg nadat die boere, nooddienste, en ander organisasies ook vroeër die middag tot na 19:00 gehelp het om 23 kinders en 3 volwassenes te red uit ‘n bus van die Weiveld Landbou- en Hotelskool wat aanvanklik eers vasgesit het, en toe ook deur die spruit se vloedwater op ‘n laagwaterbrug meegesleur is. Al die insittendes van die bus is veilig uit die water gekry nadat die kinders letterlik een-een na veiligheid gedra is van die bus na die wagtende trekker wat 5 op ‘n slag kon vervoer om hulle uit die water te kry. Besondere dank aan Neels Steyn en Geo Olivier.

A.O. le Roux het aan Gazette vertel hoedat daar na die inspannende redding van die kinders later die aand geweldig gesukkel is om die pa en dogter uit die water te kry nadat hul bakkie teen ‘n hoekpaal vasgespoel het nagenoeg 500m stroomaf. Boonop was daar ‘n sloot tussen hulle en die oewer waar reddingswerkers in die nagdonker en koue noodplanne moes beraam om hulle te hulp te snel. Pa en dogter het angstig agterop die bakkie gewag vir hulp. Die polisiebote kon nie gebruik word nie omdat baie lyndrade onder water was. “Die boere was ongelooflik met paaie wat haglik was en die water wat met tye tot borshoogte was. Uiteindelik kon pa en dogter met ‘n jetski  uitgehaal word.”

Nog reën word verwag en motoriste is gevra  om versigtig te bestuur wanneer paaie nat is en alternatiewe roetes te gebruik wanneer laagwater brûe oorspoel is. Dit is ook belangrik om stadig te ry en geduldig te wees.

Die Vaaldam wat Dinsdag 21 Februarie nog 64% vol was, is vanoggend 72% vol. Die invloei by die dam is tans 2336 kumeks en net 14 kumeks word uitgelaat. Barrage het 13 sluishekke oop met 552 kumeks wat losgelaat word. Mense moet hulle egter nie misreken nie, is gewaarsku met die vloei verby Parys wat omtrent dubbel moet wees as gevolg van al die spruite wat oorloop se invloei.