Adv. André May (president van die Luiperds Rugbyunie):

Ek dink ons is in daardie moeilike oorgangsfase waar baie spelers net nog nie op die regte vlak is nie. Die kwaliteit spelers is nie meer daar nie. SA Rugby moet nou manne soos Bakkies Botha, Victor Matfield, Fourie du Preez en Jean de Villiers vervang en dit gaan ‘n tyd vat. Dit gaan ook nie help om vir Allister Coetzee af te dank nie. Dit sal ‘n debakel wees. Dit is onbillik om ‘n afrigter so ‘n kort tyd te gee om homself te bewys. Met wie gaan jy hom vervang? Die vraag is wie wil regtig daardie Bok afrigtingspos hê.

Ons gaan al hoe meer professioneel moet raak om by die top rugbylande in die wêreld te bly wat goed genoeg is. Die afrigter kry te min tyd om met die spelers te werk en hulle in ‘n hegte eenheid te vorm.

Mervyn Taylor (bestuurder van die NWU-Puk Rugbyinstituut):

Ek glo dat die Springbokke nog steeds sal regkom. Dit gaan op hierdie stadium baie oor die keuse van spelers en die beskikbaarheid van sleutelspelers.

Party spelers is beseer of in die buiteland en dit maak ‘n groot verskil. Ek reken ook die bestuurspan kan nie vir alles blameer word nie en dat die spelers ook die blaam moet dra vir die afgelope paar vertonings.