Stop/ry in Vredefort-dorp teen volgende week weg, sê kontrakteur

Motoriste se frustrasie met twee stop/rybeheerpunte wanneer daar deur Vredefort na en van Parys gereis word, sal na verwagting eersdaags iets van die verlede wees. Volgens Sedtrade behoort die stop/rybeheerpunt in Vredefort teen 16 Mei weggevat te word, wanneer die konstruksiewerk aan die pad in die dorp self voltooi sal wees.
Kontruksiewerk aan die pad tussen Parys en Vredefort sal egter na verwagting eers einde Augustus voltooi wees. Hoewel die pad nie wyer sal wees as voorheen nie, sal die padoppervlak wat in ’n  haglike toestand was, herstel en oorgeteer wees, en sal daar vol padskouers wees hoewel die padskouers nie geteer gaan word nie.