Kaart help hulle in nood op ’n waardige manier

Al ooit gewonder of die geld wat jy iemand in nood in die hand gee, ooit werklik gaan bydra tot die persoon se welstand – of dit wys spandeer word?
Hierdie vraag wat in baie weldoeners se hart is, is dalk nou beantwoord met die bekendstelling van ’n  voedselkaart. Die kaart, ’n  eerste van sy soort in Suid-Afrika, is ’n landwye gesamentlike projek van verskeie welsynsinstansies en Shoprite Holdings. Die langtermyn doelwit is om armoede te verlig.
Die voedselkaart is soortgelyk aan ’n geskenkkaart wat skenkers in staat stel om ’n  finansiële bydrae aan persone op ’n veilige en doeltreffende manier te maak. Sodoende kan die persoon se lewenskwaliteit verbeter word deur die beskikbare fondse vir voedsel te verhoog.
Die voedselkaart stel die ontvanger daarvan boonop instaat om op ’n waardige wyse aankope te maak, en so sy menswaardigheid te behou. Hierdie aankope sluit voedselitems asook sekere nie-voedselitems soos toiletware, noodsaaklike huishoudelike toerusting, selfs medisyne in wat by enige van die 419 Shoprite Holding winkels landwyd aangekoop kan word. Geen alkohol of tabak word gefinansier nie en kan dus nie met die kaart aangekoop word nie.
Persone met spesifieke behoeftes, diëte of kulturele voorkeure word in staat gestel om ’n  keuse uit te oefen met aankope.
Aalmoese soos kospakkies beperk dikwels armes se beheer oor hul eie basiese behoeftebevrediging.
Met hierdie voedselkaart het die betrokke persoon nou ’n  keuse met wat hy/sy aankoop en word in sy/haar unieke behoeftes voorsien.
Die kaart is in die Vrystaat beskikbaar by dienspunte van Vrystaat-Versorging in Aksie (VVA) en dus plaaslik by die VVA kantoor in Buitenstraat 18, asook by Shoprite, Checkers en U Save.
Skenkers kan ook kontant skenkings maak vir hierdie doel by die VVA se kantoor.
Die VVA se takke in die Vrystaat het gedurende 2015 aan meer as 20 000 gesinne voedselhulp verleen.