Eens pragtige oord vervalle
Ngwathe besit egter tallle waardevolle bates wat tans deur verwaarlosing in duie stort, en geen inkomste lewer nie.
Ngwathe munisipaliteit is in die wurggreep van sy grootste finansiële krisis ooit. Tog faal die munisipaleit steeds om inkomste te verdien uit sy talle waardevolle bates, sommige tans onbenut en verwaarloos. So sê DA-raadslede vandeesweek in ‘n verklaring aan Gazette.
Hulle wys daarop dat Ngwathe se netto bedryfsverlies die afgelope geldjaar ‘n ongehoorde R212 miljoen was. Aan die einde van die vorige boekjaar, nege maande gelede (op 30 Junie), het Ngwathe ook ‘n enorme R1.5 miljard in agterstallige kraggelde aan Eskom geskuld. Hierdie skuld groei tans teen omtrent R10 miljoen per maand, lees die verklaring.
Ngwathe besit egter talle waardevolle bates wat tans deur verwaarlosing in duie stort, en geen inkomste lewer nie. Een hiervan is die Heilbronse Unie- feesterrein – tot onlangs ‘n gewilde en winsgewende ontspannings- en piekniekterrein by die dorpsdam. DA-raadslid Robert Ferendale was enkele dae gelede op ‘n oorsigbesoek aan die nou verwaarloosde terrein waar gesien is dat dakke, vensters, deure en elektriese kabels alles uitgeruk en weggedra is deur vandale en diewe. Hy is egter van mening dat wat oor is op die terrein kan, hoewel moeisaam en ten duurste, weer herstel word.
Hy sou gister aan amptenare skryf met die DA-raadslede se voorstelle, is verneem.
