Klagtes oor Deneysville-naam val toe nie op dowe ore nie
Deneysville, wat in 1936 geproklameer is en binnekort sy 100ste bestaansjaar vier, het ’n ryk geskiedenis en is vernoem na Deneys Reitz, voormalige minister van waterwese, en seun van die destydse staatspresident F.W. Reitz van die Vrystaat.
Klagtes van onder meer die DA en die VF Plus oor die voorgestelde naamsverandering vir Deneysville na Lekoa, het nie op dowe ore geval nie. Die Vrystaatse Provinsiale Geografiese Name Komitee het ‘n vergadering wat 23 September by die Refengkgotso Gemeenskapsaal sou plaasvind om inwoners van Deneysville se mening te kry oor die voorgestelde naamsverandering, en ook die verandering van die naam van die Gawie de Beer Wildreservaat, onbepaald uitgestel.
DA wyksraadslid Louis van Heerden sê die besluit om die vergadering uit te stel is geneem nadat die komitee ‘n gesprek met die Openbare Beskermer gehad het oor die besware en kommer oor die naamsverandering wat ontvang is, en direkte skrywes wat aan die Minister van Sport, Kuns en Kultuur gerig is.
Die DA sê hy gaan ook ‘n gemeenskapspetisie indien by die Vrystaatse Wetgewer Petisie Komitee.
Die DA sê verder die Vrystaatse Provinsiale Geografiese Name Komitee se besluit om die vergadering uit te stel is ‘n oorwinning vir die beskerming van Suid-Afrikaanse erfenis, en ‘n positiewe stap om te verseker dat publieke fondse meer effektief aangewend word vir byvoorbeeld werkskepping wat die Vrystaatse ekonomie kan help, eerder as om dit op naamsveranderinge te spandeer
Die Vryheidsfront Plus het vroeër ook gesê die Vrystaatse Departement van Sport, Kuns en Kultuur moes eers die publiek geken het in sy voorneme en moes meer gedoen het om erkening te gee aan die ryk geskiedenis van die dorp. Deneysville se inwoners het eers op 11 September te hore gekom van die voorstel. Die party het daarna ook sy beswaar teen dié naamsverandering ingedien.
Die VF Plus sê in ‘n verklaring ten spyte van verskeie versoeke vir ’n openbare vergadering in Deneysville, het die departement op
16 September slegs ’n vergadering met gemeenskapsleiers gehou, waar geen duidelike redes vir die naamsverandering
gegee is nie.
Nie net die VF Plus nie, maar ook die DA meen die voorgesteldenaamsverandering sal ‘n groot finansiële
las vir alle betrokkenes meebring sonder enige bydrae tot dienslewering, infrastruktuurontwikkeling of plaaslike
ekonomiese groei.
“Verder ignoreer die ANC-regering met hierdie voorstel die dorp se geskiedenis en ontwikkeling, wat strydig is met die
ooreenkoms van 1994,” is gesê. Ingevolge dié ooreenkoms is munisipaliteite hernoem, maar dorpe en stede se historiese name
het behoue gebly. So is Deneysville se naam behou, terwyl die munisipaliteit Metsimaholo genoem is – uit erkenning
van almal se gedeelde geskiedenis en diversiteit.
Deneysville, wat in 1936 geproklameer is en binnekort sy 100ste bestaansjaar vier, het ’n ryk geskiedenis en is vernoem
na Deneys Reitz, voormalige minister van waterwese, en seun van die destydse staatspresident F.W. Reitz van die Vrystaat.
Die DA het in sy kommer oor die voorgestelde naamsverandering van Deneysville en die Gawie de Beer
wildreservaat gesê dat die brief met die kennisgewing oor die voorgestelde naamsverandering – wat deur die Vrystaatse
Geografiese Naam Komitee geskryf is – 5 September aandui as die sperdatum vir besware. Dit is slegs ses dae voordat die
gemeenskap van die voorstel ingelig is.
Die party het beklemton dat geaffekteerde partye minstens 14 dae moes hê om besware of voorstelle te kan indien, en dat die gemeenskap van Deneysville hierdie geleentheid ontneem is om hul erfenis te beskerm.
