Die 28-jarige Janie Erasmus wat op 16 Julie in Praag in die Tsjeggiese Republiek as Mej. Dowe Wêreld 2016 aangewys is, is pas deur die ATKV vereer as trotse Centurion-inwoner en trotse Suid-Afrikaner.
Volgens Sakkie Kotze van die ATKV is daar ‘n groot behoefte vir meer begrip en respek tussen gestremdes en nie-gestremdes.’n Vers- en klankprogram waar gestremdes as kunstenaars sal optreee, word daarom tans beplan sê hy.
Janie is van Centurion en ‘n oudleerling van Hoërskool Eldoraigne. Sy is in 2015 as Mej. Doof Suid-Afrika aangewys. Die wêreldkroon was een van die pragtige skoonheid se grootste drome wat vir haar bewaarheid is.
Met haar kroning het Janie reeds gewys dat dowes net soveel dryfkrag het as horendes en is sy beslis ‘n inspirasie vir almal om haar om groot te droom.
Sy glo aan respek vir alle mense ten spyte van verskille en dat moed opgee nooit ‘n opsie is nie.
Janie is baie positief oor Suid-Afrika en sonder graag die land se mense uit vir hul vriendelikheid en die klimaat.
Janie is ‘n gekwalifiseerde skoonheidskundige wat tans as finansiële klerk by die Erasmus-groep werk waar sy ook verskeie liefdadigheidsprojekte vir hulle sal hanteer. Hierbenewens is sy ambassadeur vir die Decibel Cochlear Campaign.
Sy is die eerste Mej. Dowe Wêreld met bilaterale koglêere inplantings.
