Een van Parys se bekende oudonderwysers, juffrou Susan Nolte, is op die rype ouderdom van 93 jaar oorlede. Sy het haar in 1974 in Parys gevestig, en tot haar aftrede skoolgehou by die plaaslike laerskool.
Mev Nolte het BA HOD studeer aan die Universiteit van Pretoria en het talle leierskapsposisies beklee. In 1953 trou sy met Stephen Nolte van Parys. Hulle het op die plaas Fairview in die Heilbron-distrik geboer.
Toe sy op 42 jaar weduwee geword het, het sy na Parys verhuis.
Op haar dae was sy ‘n gerespekteerde onderwyseres, en het met liefde en dissipline haar skoolkinders onderrig. Sy was by talle
kulturele aktiwiteite, konserte, onthale, verenigings en klubs betrokke. Sy was ook ‘n ywerige en betrokke lidmaat by die Parys-Suid NG kerk.
Die afgelope jare was sy in die Sally Martin Park Versorsingseenheid in Parys, waar sy met liefde versorg is deur die personeel.
Mev. Nolte word oorleef deur haar drie kinders, Ella du Toit, Frik Nolte en Jacobus Nolte, asook sewe kleinkinders en vier agterkleinkinders.
Die gedenkdiens word gehou op Saterdag 14 September 11:00 vanuit Parys Suid NG gemeente.