Wiskunde juffrou se grootste wens om net weer sonder pyn te wees

Net R25 000 staan nog tussen die 26-jarige Liebe Keyser, ‘n oudleerder van Hoërskool Parys, en haar grootste wens om net weer sonder pyn en ongemak te wees.

Liebe is gediagnoseer met limfedeem en moet baie dringend ‘n opearsie ondergaan om ‘n gewas te verwyder en die limf te herlei na haar gesonde been. Die delikate operasie wat deur ‘n mikrochirurg gedoen sal word, word nie deur haar mediese fonds betaal nie, Hoewel die mikrochirurg  van Pretoria wat die operasie moet doen haar reeds tegemoet gekom het met sy tarief, het sy R170 000 nodig vir die operasiekoste, teaterkoste en narkotiseur.

Vriende en familie het intussen ‘n Back-a-Buddy veldtog  vir haar begin en was daar teen Vrydag 16 Augustus reeds R144 917 vir haar ingesamel.  Die operasie is geskeduleer vir 30 Augustus in die CintoCare hospitaal, en moet Liebe die laaste sowat R30 000 voor dan hê om te verseker dat die operasie gedoen kan word.

Liebe gee tans Wiskunde vir graad 4 leerders van die Laerskool Northmead in Benoni. Haar pad van uitdagings het begin nadat sy ‘n liesbreuk operasie in Maart 2023 moes ondergaan. Skaars drie maande na die operasie, het haar voet begin swel. Vele toetse en skanderings later waarvan sy ook baie uit haar sak moes betaal weens die beperkings van haar mediese fonds, is vasgestel dat dit limfedeem is.

Nog kostes het gevolg vir verskeie limfdreineringsbehandelings, peperduur spesiale limfkouse wat sy steeds moet dra, en maande van konstante pyn en ongemak wat sy  verduur.

Toe sy in Februarie by die dokter was wat oorspronklik die liesbreukoperasie gedoen het, is agtergekom dat daar ook ‘n gewas is, en hoewel nie kwaadaardig nie, dra dit by tot haar ongemak en moet dit dringend verwyder word omdat die swelling in haar been toeneem en geweldige pyn veroorsaak.

Liebe sou aanvanklik vandag geopereer word, maar omdat sy nog nie die geld vir die operasie kon bymekaar kry nie, is die operasiedatum geskuif na die 30ste Augustus in die hoop dat sy voor dan die uitstaande bedrag sal hê

“Om vir geld te vra, was nog nooit iets wat ek wou doen nie, maar ek is desperaat vir hulp,” sê Liebe. “Ek sukkel soms om deur my dag te kom,” vertel sy. Haar beroep is haar passie en gee sy ook na skool ekstra Wiskundeklas om haar geld aan te vul. “Ek het al meer dokters gesien as wat ek kan tel, maar nog niemand kon my voorheen help nie,” sê sy.

Haar hoop is dat sy voor die 30ste die geld vir die operasie sal hê om weer ‘n vol lewe te kan leef sonder pyn om te doen wat sy die meeste van hou – om in die toekoms van kinders te belê en met hulle haar liefde vir Wiskunde te deel.

Mense wat vir Liebe kan help kan die BackaBuddy skakel volg by https://www.backabuddy.co.za/campaign/liebe-keyser-operation