506 Brode vir hulle wat dit broodnodig het
As jy nog wil bydra tot die projek kan jy brood afgee by die VVA-kantoor in Buitenstraat, Parys. Broodbydraes wat opgelaai moet word, kan met Sanette by 079 324 0603, of met Charisma by 082 680 8929 gereël word.
Of dit ‘n brood of ‘n broodrolletjie is – met ‘n brood kan jy ver kom, veral as daar baie honger magies is om vol te maak. Hoe bitter moet dit nie wees om sonder kos in hierdie koue te wees nie, of om ‘n kind honger skool toe te stuur nie.
Die afgelope week was die gemeenskap van Parys se harte weer oop vir die nood van ander en is oorweldigende steun vir Vrystaat Versorging in Aksie se jaarlikse Broodjiedag gekry. Nie minder nie as 506 brode is reeds teen Maandagoggend ontvang. Die brode help vir die organisasie se daaglikse sopkombuis en die gesinspakkies wat vir gesinne in nood gepak word. So ook die kosblikkies wat daagliks vir kinders gepak word wat andersins nie ‘n broodjie vir pouse sou hê nie.
Dankie aan elkeen wat bygedra het om hulp te verleen vir hulle wat dit so broodnodig het.
