Pad herstel na skade toe tenkwa brand
Herstelwerk aan die pad is reeds Vrydag voltooi en is die pad oop vir verkeer.
Skade aan die R59 tussen Parys en Vredefort is reeds herstel na ‘n insident verlede Donderdag toe ‘n diesel tenkwa sowat 8,7km buite Parys aan die brand geslaan het . ‘n Wiel van die vragmotor wat vasgeslaan het, het waarskynlik die brand veroorsaak.
Die insident het net voor 06:00 die oggend gebeur, en was dié gedeelte van die R59 gesluit vir verkeer tot net voor 18:00 Donderdagmiddag.
Die Departement van Gemeenskapsveiligheid, Paaie en Vervoer in die Fezile Dabi Distrik onder leiding van Evodia Phalatfe (die departement se hoofingenieur), James Nkabinde (hoof paaie inspekteur ) en Tshidi Nakedi (die departement se paaie superintendent vir Ngwathe en Metsimaholo en sy span), het dadelik werk gemaak om die pad te herstel na kommer oor die veiligheid van motoriste weens die skade aan die pad.
Die skade aan die padoppervlak is reeds Vrydag herstel.
Die foto hierbo is verlede Donderdag op die R59 tussen Parys en Vredefort geneem waar die diesel tenkwa aan die brand geraak het.
