Moord op kerkman: Twee weer in Augustus voor die hof
Beide mans wat vir die moord aangekla is het 'n lang lys van vorige veroordelings
Blonde Motale en Piet Mbele, die twee mans van die Tumahole-woonbuurt wat vir
die moord op Kenny Browne (72) teregstaan, het verlede week vlugtig in die landdroshof in Parys verskyn. Die saak is uitgestel na 14 Augustus wanneer ‘n streekhofdatum na verwagting gegee sal word.
Kenny is deur sy moordenaars met ‘n plastieksak versmoor. Sy lyk is op 3 Maart deur ‘n gemeentelid van die Metodiste Kerk, Margie Frare, in sy huis in Fochstraat gekry.
Sy het na hom gaan soek omdat hy nie soos gewoonlik die Sondagoggend by die kerk was nie.
Kenny se selfoon en die selfoon van nog ‘n bejaarde vrou van Parys, wat in ‘n afsonderlike voorval in haar huis oorval en aangerand is, is in die mans se besit gevind.
Die polisie het ook beslag gelê op Kenny se skootrekenaar, sy gasbottel en ander elektroniese ware wat oënskynlik deur die mans verkoop is.
