Rotaryklubs van onder meer Vanderbijlpark, Potchefstoom Mooi, Bothaville, Orkney,Vanderbijlpark, Klerksdorp en Vereeniging het sedert verlede week na ‘n versoek van die plaaslike Rotaryklub, begin om water bymekaar te maak vir inwoners van Parys wat die afgelope weke onder ernstige waternood gebuk gaan.
Die waterkrisis affekteer veral ook bejaardes en mense wie nie die vermoë het om grootmaat water aan te koop vir huishoudelike gebruik nie.
Parys Rotary-president Sandra Uys het Rotary-klubs in omliggende dorpe gevra om saam te staan om te help om drinkwater bymekaar te maak wat versprei sal word na waar nood die grootste is. Saterdagoggend is 1 035 liter gebottelde water in Parys afgelaai, en word nog gebottelde water verwag soos wat Rotaryklubs besig is om planne te maak om op die langtermyn te probeer help. Maandagoggend is 400 liter gebottelde water van Klerksdorp ontvang asook ‘n 200 liter skenking van die Rotaryklub in Orkney.
Bothaville se Rotaryklub het reeds honderd en vyftig 5 liter bottels water geskenk, terwyl die Rotaryklub in Vanderbijlpark gehelp het om die Sonskyn Tehuis se watertenks vol te kry. Nog 2 400 liter gebottelde water word ook vandag, Donderdag 19 Oktober in die dorp verwag met die Benonin-klub wat onder meer 200 bottels water kom aflaai het.
Save Ngwathe en rdl. Selma Kok sal help met die verspreiding van die water, het Sandra gesê.
Danksy die hulp kon Vrystaat Versorging in Aksie vandeesweek ook gehelp word met gebottelde water vir mense in nood na wie hulle omsien. Die beplanning is dat die Rotary-saal as 24-uur afsetpunt ingerig sal word vanwaar water deurlopend versprei kan word, het Sandra gesê.
