Ora Basson het diep spore getrap in baie harte

Ora Basson, wat vir baie jare onder meer ‘n bekende gesig by Parys se DBV was, is op 5 Mei in die ouderdom van 88 jaar oorlede.

Sy het in Christiana in die destydse Wes-Transvaal grootgeword en gematrikuleer. In 1958 trou sy met Johann Basson, en is vyf kinders vir die egpaar gebore.

Sy spandeer die grootste deel van haar lewe op die familieplaas aan die Potchefstroom-kant van Parys waar sy self werk en bou aan die droom vir die plaas.

Met Johann se afsterwe in 1979 is sy alleen agtergelaat om haar vier seuns en dogter deur die skool en universiteit te sien.

Sy word ‘n bekende en geliefde gesig waar sy by dr. Theron & Van der Westhuizen gewerk het. Later het Parysenaars met haar kontak gehad as administratiewe bestuurder by Shoprite.

Na haar aftrede spandeer sy al haar tyd aan haar ander groot liefde – diere, veral honde, as vrywilliger by die plaaslike DBV.

Toe die ouderdom haar begin inhaal, het sy steeds daarvan gehou om die ander dames op kort ritte te neem om te gaan cuppachino drink. ‘n Getroue vierbeen metgesel altyd aan haar sy, wat net so deel was van haar lewe as haar kinders en kleinkinders.

Sy was ook ‘n besige ouma wat kleinkinders rondgery en opgepas het, en oral gehelp het waar sy kon. Haar kleinkinders het haar baie na aan die hart gelê.

Met haar groot hart en baie liefde en omgee het sy diep spore in baie mense se lewens getrap .