Motoriste ernstig gewaarsku: Dié pad is onder water
Motoriste word aangeraai om vooraf seker te maak van alternatiewe roetes.
Motoriste is weer ernstig gewaarsku dat die gedeelte van die R59 tussen Viljoenskroon en Bothaville (naby die silo’s net buite Viljoenskroon aan Bothaville kant) gesluit is vir verkeer.
Die water van ‘n pan loop sterk oor die pad. Nog ‘n vragmotor is gisteraand (Donderdag 25 Mei) in die water in. Nooddienste kon daarin slaag om die vragmotor en passasiers wat op die vragmotor was veilig uit die water te kry. Insleepdienste het vanoggend begin met die groot taak om die vragmotor uit die water te sleep.
Minder as twee weke gelede is ‘n vragmotor ook in die water in op die gedeelte van die pad.
Hou asseblief ook ingedagte dat die Koppies/Parys-pad vanaf Koppies tot by die N1 steeds gesluit is vir teerwerk wat gedoen word. Die verwagting is dat die gedeelte van die pad pad waaraan gewerk word, volgende week teen Donderdag/Vrydag (1 of moontlik 2 Junie) weer oop sal wees vir verkeer. Gebruik asseblief die N1 of R720 as alternatiewe roetes.
