Checkers Mini’s sorg toe vir 400kg se hondekos

Almal ken hulle. Sommige versamel hulle, ander gee hulle weg, maar danksy haar blink plan, het ’n graad 10 leerder van Hoërskool Parys, met Checkers Mini’s ’n groot verskil vir die DBV gemaak.
Deandré Pieterse het Vrydag nie minder nie as 400kg se hondekos aan Parys DBV oorhandig. en boonop ’n hele paar ywerige mini-versamelaars gehelp om hul versamelings vol te maak.

Met die mini’s wat sy gehad het en wat mense vir haar geskenk het, het Deandré mense aangemoedig om 1kg hondekos teen R15 by haar te koop in ruil vir die Checkers mini wat jy kort. Só het sy in ’n japtrap die 400kg se hondekos bymekaar gemaak.
In graad 5 al het Deandré en haar ma, Monica, met die blink ruilpan vorendag gekom, en kon sy toe 1,1 ton se hondekos aan die DBV oorhandig.
Toe daar weer vanjaar ’n splinternuwe Checkers mini-reeks beskikbaar gestel is, het Deandré op Facebook begin rondvra om te hoor of mense dié keer weer bereid sou wees om mini’s te ruil vir hondekos. Die reaksie was so positief dat sy weer die projek aangepak het.
Uit ’n 25kg sak hondekos het sy die 1kg pakkies hondekos opgemaak wat sy dan vir R15 verkoop het, in ruil vir ’n mini.
Sy het selfs volledige versamelings van vorige mini-reekse gehad wat mense kon ruil – ’n mini vir hondekos.

Haar liefde vir diere sien jy sommer gou raak as jy kyk na die besondere band tussen haar en haar worshond/Skotse terriër reuntjie, Diesl.

Diesl was immers ook die inspirasie vir Deandré se eie onderneming, Diesl and Me wat sy al die afgelope twee jaar bedryf.
Sy verkoop hondebedjies, leibande, speelgoed en selfs die fraaiste “klere” vir viervoete. Haar ouma het haar touwys gemaak agter die naaimasjien. Eers het sy leer haarrekkies maak, maar kort voor lank was sy so vaardig agter die naaimasjien dat sy die meeste van haar voorraad wat sy op markte en aanlyn verkoop, self kon maak.