By die hangbrug, voor Anna Patat in Breëstraat, en by die Metodiste kerk het hulle gehang aan lamppale en in bome. Kleurvolle brei- en hekelwerk met nie minder nie as 85 stelle mussies, serpe en handskoene vir wie ook al ‘n bietjie winterwarmte sou nodig hê. Om te vat – gratis, sonder dat jy hoef te vra.
Saam met die serpe, musse en handskoene die boodskap: “I’m not lost!!!” If you are cold and need me, please take me.”
Hierdie mooi inisiatief is in Junie deur ‘n handjievol Parysenaars, maar ook mense van Johannesburg, Klerksdorp en Vanderbijlpark begin wat gehelp brei en hekel het, of bydraes gegee het uit hul eie klerekas van dit wat in onbruik was. Ander het gehelp met bydraes vir wol en hekelgare.

Verlede Woensdag kon dit wat gemaak en bymekaar gemaak is, uitgedeel word.
Behalwe vir dit wat opgehang is, het hierdie samaritane ook uitgegaan en vir haweloses in die dorp en langs die rivier van die serpe en musse gegee.
Die projek was deel van die landwye 67 Blankets for Mandela inisiatief.