As jy nie in Parys bly nie, sal jy nie weet wat “smartie” krag is nie.
Maar vir Parysenaars laat dié ”smartie” beurte ‘n baie bitter smaak in die mond.
Want “smartie” beurtkrag is die naam wat Parysenaars spottenderwys gegee het aan die kleurkolletjies op die Ngwathe munisipaliteit se rotasie beurtkragskedule. En die bitterheid gaan daaroor dat “smartie” beurte nou bo en behalwe Eskom se reeds lang ure van nasionale beurtkrag toegepas word, om die dorp se swak onderhoude en brose kragnetwerk van oorlading te beskerm.
Wat Parysenaars die meeste die josie in het is dat dié rotasie beurtkrag sonder waarskuwing ingestel word. Sodra die las op die netwerk té hoog word, is jy skiellik in die donkerte as dit jou “smartie” beurt is. En soms selfs as dit nie jou beurt is nie, soos wat Dinsdagaand 5 Julie, die geval was toe meer as een gebied se krag afgeskakel moes word om die las op die netwerk te help verlig.
En die kersie op die koek is dat daar weens foute op die netwerk, diefstal en sabotasie aan kraglyne en mini-substasies, al soveel skakelings op die netwerk verander moes word, dat niemand meer seker is watter “smartie” hulle in die beurtkragpakkie is nie. Geel, rooi, groen of blou – wie weet, want die “Smartie” pakkie is nou behoorlik deurmekaar. En die “smarties” val nou sommer gelyk uit die pakkie in alle kleure.
Inwoners sê daar is al tevergeefs gevra vir ‘n nuwe en op datum skedule.
Die munisipale beurtkragskedule is aanvanklik opgestel toe rotasie beurtkrag die eerste keer ingestel is en die munisipaliteit toe gehelp is om met behulp van kaarte van die dorp se kragnetwerk, die dorp op te deel met kleurkodes wat dan om die beurt afgesit word.
Soos wat die kaart en skedule versprei is, het dit op WhatsApp groepe die kolletjie-gesig gekry wat nou bekendstaan as die “Smartie” krag wat helaas alles behalwe “smart” is vir die inwoners van dié dorp.
