Daar is geen doekies omgedraai oor die gemeenskap se woede met die onuithoudbare situasie waarmee inwoners as gevolg van Eskom en Ngwathe se stryd oor wanbetaling al vir bykans drie dae sonder krag en water sit. Sowat 500 mense het die vergadering voor die stadsaal bygewoon en was dit duidelik – die gemeenskap wil nie meer beloftes hoor nie. Hulle soek nou krag en water.
Die vergadering in ‘n neutedop:
- Die burgemeester verduidelik dat hulle Eskom die R1 086 006,30 sal betaal maar dat hulle eers ‘n onderneming van Eskom soek oor wanneer kragtoevoer herstel sal word, en of dit van Ngwathe se lopende rekening sal afgaan.
- Die burgemeester sê volgens munisipale wet kan die bedrag nie oor ‘n naweek oorbetaal word nie omdat daar nie magtiging vir betalings na-ure en oor naweke is nie, en dit as vrugtelose uitgawe gesien sal word.
- Sakeman Saal de Jager en ook Ngwathe raadslid bied aan om die genoemde bedrag uit sy sak te betaal, mits die burgemeester waarborg kan gee voor diegene teenwoordig dat die geld teen 10:00 môre oggend terug in sy rekening sal wees.
- Die burgemeester kon egter nie die versekering gee nie. Sy sê dit moet deur die munisipale bestuurder en hoof finansiële beampte gegee word.
- Daar was met die skrywe van hierdie berig steeds nie ‘n waarborg deur die munispaliteit gegee oor of die munispaliteit die terugbetaling voor 10:00 more sal doen, sou rdl. De Jager die geld oorbetaal.
- Eskom het reeds aangedui dat hy sal begin met herstelwerk in die substasie sodra die betaling in sy rekening reflekteer of ‘n bank gewaarborgde tjek voorsien word.
- Eskom het ook reeds aangedui dat wanneer die betaling ontvang word, dit nie gekrediteer sal word teen Ngwathe se lopende rekening nie omdat Ngwathe se lopende Eskom rekening agterstallig is.
- Die burgemeester het aangedui dat Ngwathe tans 50% van sy rekening betaal gedurende die wintermaande omdat winter en somertariewe vir die munispaliteit aan Eskom verskil, en die munisipaliteit nie gedurende die wintermaande die volle rekening kan betaal met die hoër wintertarief nie.
- Die hoop is dat sou Eskom die betaling ontvang, die tweede transformator in werking gestel sal word sodat kragtoevoer herstel kan word terwyl herstelwerk aan die ander transformator gedoen word.
- Baie was ongelukkig omdat hulle nie kon hoor wat die burgemeester sê nie omdat klank onvoldoende was.
- Mense dring aan om direk aan Eskom of ‘n derde party te betaal.
- Mense wil weet waarheen hul geld gaan.
- Dit is duidelik dat daar nie vertroue is tussen Eskom en Ngwathe nie.
- Daar is ook samesprekings tussen Eskom en Ngwathe Dinsdag juis oor Ngwathe se rekening en die betalingsplan vir die enorme agterstallige skuld.
Dit bly onverstaanbaar en onaanvaarbaar dat die munisipale bestuur met die uitsondering van die burgemeester, nie teenwoordig was by die ure lange onderhandelinge met Eskom waarin die Ontwikkelingsforum alles probeer het om ‘n skikking met Eskom te probeer bereik. Dit terwyl Ngwathe se huis nie in orde is nie. Die vraag is wat sou word as die Forum nie toegetree het nie?
Met die onderhandelings was dit duidelik dat Eskom in kwader trou onderhandel het, en dat die tydsberekening vir die kragkrisis fyn gekies is, daar heeltyd gespeel is vir tyd om die krisis so lank moontlik uit te rek.
The copyright to this information resides with The Parys Gazette and may be shared as a link to the original or refence to the author but may not be copied without the explicit permission of the author.
