Die polisie in samewerking met sekuriteitsmaatskappye in die dorp het verlede week ‘n optrede in die dorp gehou.
Tydens die optrede is twee persele besoek om onder meer vir gesteelde eiendom en dwelms te soek. Daar is tydens die operasie profielsamestellings van 33 persone wat op rekord gehou sal word, gedoen.
Die persele wat besoek is, was by die kruising van Breë- en Van Collerstraat by die spruit agter die Sasol-vulstasie, asook by die halfbeboude perseel in Father Balinkstraat. Optredes soos hierdie vorm deel van misdaadvoorkoming in die dorp waartydens gefokus word op sigbaarheid en operasies ter voorkoming van misdaad.
Hoewel daar die maand ‘n effense afname was in huisbrake en inbrake by besighede sowel as veediefstal, bly diefstal steeds ‘n groot probleem in Parys. Dit is veral hekmotors en lugversorgers wat deur diewe geteiken word.
Onthou asseblief om nie vir allerhande aanlyn aankope en slenters te val nie.
Jy moet weet as jy geld in iemand se rekening oorbetaal vir allerhande blink beloftes, is daar die risiko dat jy die geld gaan verloor.
Daar is al male sonder tal gewaarsku dat wanneer iets te goed klink om waar te wees, dan is dit nie waar nie. Spyt kom altyd té laat en mense verloor steeds hul swaarverdiende geld of spaargeld.
Maak eerder gebruik van betroubare aanlyn webtuistes wanneer jy aankope doen.