“Ons krane raak gedurig droog, meestal sonder enige waarskuwing,” sê ‘n inwoner, me. Manda Lynch. Sy sê die verduidelikings wat van amptenare gekry word is boonop vreemd en dikwels teenstrydig.
DA-raadslede Saal de Jager en Sabatha Segoba, het onlangs tydens twee oorsigbesoeke aan Vredefort se wateraanleg verskeie probleme raakgesien. “n Kontrakteur wat die aanleg moet opknap was blykbaar drie maande laas op die perseel,” sê rdl. De Jager. Hulle het ook kwelvrae oor skynbare beplanningsfoute. Van die vrae sluit in waarom water nie per pypleiding aan sekere nuwe erwe voorsien word nie, en nou ten duurste per tenkwa voorsien sal moet word.
Rdl. Segoba het namens hulle vrae opgestel, onder meer oor gebrekkige prosesbeheer, swak herstelwerk, en onvoldoende toesig, sowel as ‘n gebrek aan toerusting. Volgens hom word selfs sekere chemiese reinigers ongeberg aan weer en wind blootgestel. Die vrae is by Ngwathe se tegniese direkteur ingedien en is hulle ook besig om die vrae met tegniese kenners en ANC-raadslede van Vredefort te bespreek. De Jager en Segoba sou die aanleg weer Dinsdag besoek het.
