Die sabotasie van die mini-substasies in Jan Fiskaalstraat in Oudewerfpark, en in Boomstraat, het benewens die finansiële skade vir die Ngwathe munisipaliteit, sommige inwoners vir ure sonder krag gelaat, terwyl tegnici die kragtoevoer moes herstel.
Die kommerwekkende toename in voorvalle van diefstal, sabotasie en vandalisme by sleutelpunte in Ngwathe se water- en elektrisiteitstoevoernetwerk, noodsaak lank reeds drastiese optrede.
Daarom is as gesamentlike inisiatief tussen die Ngwathe Munisipaliteit en die Parys Ontwikkelingsforum, die moontlikheid ondersoek om sekuriteitskamerastelsels by drie sleutelpunte in die dorp se water- en elektrisiteitsnetwerk te installeer.
Die sukses van sekuriteitskamerastelsels wat langs paaie en by ander sleutelpunte in die area geïnstalleer is, het reeds bewys dat dit groot sukses het met misdaadbekamping, ​​en kan dit hopelik ‘n einde bring aan die gereelde verliese wat die munisipaliteit, sake-eienaars en inwoners ly. Sodra dit geïnstalleer is, sal die kameras 24/7 gemonitor word met onmiddellike reaksie, sou enige kriminele aktiwiteite opgetel word.
Vir die installering van die sekuriteitskamerastelsels by die drie sleutelpunte wat geïdentifiseer is, word ‘n bedrag van minstens R330 000 egter benodig, waarvoor ondersteuning van die sakegemeenskap sowel as inwoners broodnodig is om met befondsing te help.
Die projek sal in fases gedoen kan word met minstens R50 000 wat nodig is vir die eerste fase van die installasie.
Die sakesektor en inwoners kan bydra vir die projek deur ‘n skenking in die volgende rekening te maak: Parys Ontwikkelings Forum, FNB, Gold Business Account, Rekeningnommer: 63005811773, Takkode: 230736, Taknaam: PARYS