Lede van die Vroue Landbou Unie (VLU) in Parys het onlangs ook hul deel gedoen vir die “Woman walk the world” inisiatief wat gewoonlik in April gehou word.
Vroue regoor die wêreld neem jaarliks deel aan dié inisiatief om só ‘n hand van vriendskap en hulp uit te steek na ander vroue om op hierdie manier ‘n verskil in hul lewens te maak.
Om te kon deelneem is die bedrag van R20 gevra wat min of meer die prys van ‘n brood is, sodat vroue in landelike gebiede gehelp kan word om kos vir hul families op die tafel te sit. Die fondse wat ingesamel word met die inisiatief, word “Pennies for Friendship” genoem.

Die vroue van die Parys VLU het die “Woman walk the world” inisiatief ondersteun toe die koue trotseer is om aan die weeklikse Saterdagoggend Egweni River Lodge parkrun deel te neem.
Die VLU vroue ondersteun jaarliks die projek, en is dit terselfdertyd ‘n geleentheid om die VLU as organisasie aan die publiek bekend te stel.
Gaan lees gerus meer oor die projek op die ACWW (Association Country Woman of the World) webtuiste, of kom loer in by die volgende VLU-byeenkoms.