Die skoolhoof van Parys Primêre skool, mnr. Shaun Strydom, geniet ’n stil oomblik in die nuwe skoolbiblioteek. Foto: Verskaf
Parys Primêre skool spog deesdae met ‘n volwaardige en kleurvolle skoolbiblioteek vir sy leerders. Dit danksy ‘n projek wat deur die skool se ouerkomitee aangepak is.
‘n Prag muurskildery deur die talentvolle kunstenaar Karin Ter’Blanche, nooi jou binne en laat die kleurvolle leeshoekie jou dadelik welkom voel. Die rakke is geverf, matte en dakwaaiers ingesit en bied die biblioteek naas ‘n verskeidenheid van Afrikaanse en Engelse boeke, ook rekenaarfasiliteit vir navorsing vir leerders se skooltake.
Daar is einde 2021 met die projek begin en kon leerders verlede week gaan inloer om die biblioteekrakke te verken. Leerders van graad 1-7 kan boeke uitneem op Maandae en Woensdae tussen 13:30 en 14:30.
Die opknapping van die skoolbiblioteek is deur Parys Primêre skool se ouerkomitee met groot sukses aangepak. Op die foto is die ouerkomitee-lede.
