Gerda de Lange van die Wes-Kaap skryf:

Ek woon in die Wes-Kaap my dogter-hulle in Meyerton. Sy is swanger met haar eersteling en die verwagte datum is in Junie. Hulle sien ‘n privaatdokter vir die maandelikse ondersoeke, maar het nie die geld vir ‘n private kraam nie.

Hulle het vandag (30 Maart) van hospitaal tot hospitaal gery om vir haar ‘n plekkie te kry om die geskenk van Bo lewe te gee. Maar by al die staatshospitale in die Vaaldriehoek mag die pa nie by staan nie (blykbaar oor Covid). Hoe werk dit? Dit is haar eerste baba en sy moet dan alleen saam met vreemde mense deur die verskriklike pyn gaan. Dit is vir my as ‘n nuwe ouma onaanvaarbaar!

Is daar iewers waar ek kan kla hieroor? Covid kry nou meer mag as ‘n pa. In die ou jare was die pa van die kind altyd langs die vrou. Wat het verander? Wat het van daai tye geword? Dis die eerste goeie oomblikke vir ‘n pa om by die geboorte te wees en te deel in daai blydskap, daai trots, daai geluk.

Is dit net ek of is daar ander wat ook so dink? Dis tog nie net die ma wat die kind maak nie, maar die pa ook en hy het die reg om by te wees met daardie eerste oomblikke.

Nie almal het geld vir ‘n private kraam waar die pa mag by wees nie. Covid het soveel mense van mekaar af weggevat en net toe dit lyk asof dinge begin teruggaan na normaal, loop dinge weer van die pad af!